Зэсийн эрэлт нэмэгдэж байгаатай зэрэгцээд Монголд цаашид зэсийн хайгуулыг нэмэгдүүлж магадгүй гэж “Bloomberg”-ийн шинжээчид таамаглаж байна. “Оюу Толгой”-ийн далд уурхайн бүтээн байгуулалтын ажил ид өрнөж байгаа бөгөөд 2020 он гэхэд бүтээгдэхүүнээ гаргаж эхэлнэ. Түүнчлэн “Erdene Resource Development”, “Xanadu Mines”, “Copper” компанийн талбай дахь хайгуулын ажил амжилттай үргэлжилж байна. “Kincora Copper”-ийн хувьд гол төсөл болох “Хүрэл үнэг”-ээс гадна “Оюу Толгой”-той ижил төстэй өндөр чанар бүхий алт, зэсийн нөөц байх магадлалтай Баян тал талбайд өрөмдлөг хийж байгаа юм. Мөн энэ онд 3000 метрийн өрөмдлөг хийх зөвшөөрөл авсан “Turquoise Hill Resources” компани “Оюу Толгой” ордын ойролцоо шинэ талбайд хайгуул хийж эхлээд байна. Үүнээс гадна шинээр хайгуулын тусгай зөвшөөрөл олгох ажил үргэлжилж байна. Өргөдлийн журмаар тусгай зөвшөөрөл олгох 13.6 сая га талбайн тал орчим хувь нь алтны хэтийн төлөв бүхий талбай байгаа бол зэсийн хайгуулын талбайнууд нутаг дэвсгэрийн хойд хэсэг голчлон төвлөрч байгаа гэдгийг АМГТГ мэдээллээ. Харин экспорт талаас нь харвал гол эрсдэл нь улс төрийн тодорхой бус байдал нь Монголын БНХАУ-тай хийх худалдаанд эрсдэл болдгийг “Bloomberg”-ийн шинжээчид онцолж байна. Монгол Улсын хувьд 2014 оноос эхлэн БНХАУ-ын гурав дахь том зэсийн баяжмал нийлүүлэгч орон болсон юм. Энэ оны эхний долоон сард 852.7 мянган тонн зэсийн баяжмал экспортолсон талаар Үндэсний Статистикийн Хорооноос мэдээллээ. Хэдий тийм боловч энэ нь өнгөрсөн оны мөн үеэс 10 хувиар бага дүн болжээ. Гэхдээ төгрөгийн ханш сул байгаа нь Монголын экспортлогчдын өрсөлдөх чадварыг сайжруулж байна гэж “Bloomberg”-ийн шинжээчид дүгнэлээ. 2014 оноос хойш төгрөгийн ханш ам.долларын эсрэг 47 хувиар сулраад байна.

Эх сурвалж: Bloomberg TV Mongolia