Lucid компани 1 тэрбум ам.долларын хөрөнгө оруулалт авна

Саудын Арабын хөрөнгө оруулалтын сангаас (PIF) 1 тэрбум долларыг тансаг зэрэглэлийн цахилгаан машин үйлдвэрлэгч Lucid компанид хөрөнгө оруулах тухай мэдэгдлийн дараа тус компанийн хувьцаа өслөө.

Хөрөнгө оруулалтын сангаар дамжуулан Lucid-ийн 60 хувийг эзэмшдэг Саудын Араб улс эдийн засгаа газрын тосны хамаарлаас гаргах санаачилгын хүрээнд тус компанид хөрөнгө оруулалт хийсээр байна.

Хөрөнгө оруулалтыг АНУ-ын үнэт цаасны зохицуулагчийн мэдүүлэгт дэлгэрэнгүй дурдсан ба хөрөнгө оруулалтын сангийн нэг салбар болох Ayar Third Investment Company хөрвөх давуу эрхийн хувьцааг худалдан авах замаар хийнэ.

Автомашин үйлдвэрлэгч 4-р улирлын санхүүгийн тайландаа 2024 онд 1.5 тэрбум долларын хөрөнгө оруулалт хийхээр төлөвлөж байгаа бөгөөд энэ оны сүүлээр Gravity SUV автомашинаа худалдаанд гаргахаар төлөвлөж байна хэмээн мэдэгдэж байсан.