Ханшийн уналтаас ашиг хүртэх боломж арилжаачдын дунд бий болно. /Үнэт цаасны зээлийн хуульд орсон онцлох өөрчлөлтүүд/

УИХ-аас Үнэт цаасны зах зээлийн тухай хуульд нэмэлт өөрчлөлт оруулаад байна. Тус хуульд орсон онцлох, шинэлэг, шинэ бүтээгдэхүүн гаргах боломжийг олгосон өөрчлөлтийг тоймлон хүргэж байна.

Тоймловол:

Банкны хадгаламжийн сертификат

Хувьцааны хамтын санхүүжилт

Үнэт цаас зээлэх зээлдүүлэх

Гэрээний үндсэн дээр байгуулах хөрөнгө оруулалтын сан

 

 

• БАНКНЫ ХАДГАЛАМЖИЙН СЕРТИФИКАТ

 

Арилжааны банкнуудад харилцагчид бодит үнэт цаасан дээр хэвлэж өгдөг нэг төрлийн хадгаламжтай төстэй бүтээгдэхүүн байдаг.

Онцлог нь: Харилцагч мөнгө хэрэг болсон үедээ хадгаламжаа цуцалбал хүү буурдаг бол хадгаламжийн сертификатыг өөр этгээдэд зарахдаа ашигласан хугацааны хүүгээ шингээх боломж нээлттэй байдаг.

Сул тал нь: Хэвлэсэн үнэт цаасыг хадгалах, цаасан хэлбэрээр арилжаалахад хүндрэл тулгардаг.

Хууль батлагдсанаар: Тус бүтээгдэхүүнийг үнэт цаасны зах зээлд арилжаалах боломж бүрдсэнээр хөрвөх чадвар сайжрах, хадгалах, арилжаалах хэлбэр нь биет бус хэлбэртэй болох давуу талтай юм.

 

 

• ХУВЬЦААНЫ ХАМТЫН САНХҮҮЖИЛТ

 

Онцлог нь: Хамтын санхүүжилт нь тухайн бизнесийг санхүүжүүлэхэд шаардагдаж буй санхүүг олон хөрөнгө оруулагчийн тусламжтайгаар хялбараар богино хугацаанд шийдэхийг хэлдэг.

Давуу тал нь: Олон төрлийн бичиг баримт бүрдүүлэх шаардлагагүйгээр цахим орчинд хөрөнгө оруулалт татдагаараа онцлогтой.

Дэлхий дахинд алдартай Хамтын санхүүжилтийн платформуудаас дурдвал Kickstarter, GoFundMe, StartEngine зэргийг хэлж болох юм.

 

 

• ҮНЭТ ЦААС ЗЭЭЛЭХ, ЗЭЭЛДҮҮЛЭХ

 

Онцлог нь: Арилжаачдын хэлж заншсанаар /Short/ шорт арилжаа нэвтрэх боломж бүрдэж байна гэсэн үг. Товчхондоо өөрт байхгүй хувьцааг зээлж зараад ханшийн уналтаас ашиг хийхийг хэлдэг.

Хууль батлагдсанаар: Монголын хөрөнгийн зах зээлд ногдол ашиг, ханшийн өсөлтөөс ашиг  олдог бол цаашид энэ төрлийн бүтээгдэхүүн бий болсноор ханшийн уналтаас ашиг хүртэх боломж арилжаачдын дунд бий болно.

 

• ХӨРӨНГӨ ОРУУЛАЛТЫН САНГ ГЭРЭЭНИЙ ҮНДСЭН ДЭЭР БАЙГУУЛАХ

Онцлог нь: Хөрөнгө оруулалтын санг үүсгэн байгуулахад тусгай зориулалтын компани хэлбэртэй ХХК үүсгэн байгуулж улсын бүртгэлд бүртгүүлэх хуулийн зохицуулалттай.

Хууль батлагдсанаар: Хөрөнгө оруулагчид гэрээ байгуулж хуулийн этгээдийн эрхгүй хэлбэрээр санг гэрээний үндсэн дээр үүсгэн байгуулах шинэ боломж бүрдэж байна. 

 

Дүгнэлт:

• Шинэчлэгдсэн хуулийн хүрээнд давхардсан тоогоор 12 төрлийн журамд өөрчлөлт орох, шинээр батлагдах хүлээлттэй байна. Эдгээр өөрчлөлт, шинэ журмууд батлагдаж Хууль, зүйн яаманд бүртгэгдсэнээр дээрх зохицуулалт бодитоор хэрэгжих юм.