Ferrari цахилгаан автомашин үйлдвэрлэнэ.

Он гарсаар 20 гаруй хувийн өсөлт үзүүлсэн тансаг зэрэглэлийн автомашин үйлдвэрлэгч Ferrari компани цахилгаан автомашин үйлдвэрлэхээ зарлалаа.

Энэхүү тансаг зэрэглэлийн цахилгаан автомашины үнэ ойролцоогоор $535,000 байна гэсэн таамаглал байгаа юм.

Ferrari-ийн автомашинууд хүчтэй шаталтат хөдөлгүүрийн чимээ, хүнгэнэх дуугаараа бусдаас ялгардаг бол цахилгаан автомашины моторууд чимээ багатай гэдгээрээ онцлогтой.

Энэ талаар тус компанийн гүйцэтгэх захирал Бенедетто Вигнаги хэлэхдээ, Ferrari-ийн хүчирхэг акустик дуу үргэлж жинхэнэ байх болно. Тиймээс цахилгаан хөдөлгүүрт загварууд нь хуурамч шаталтат хөдөлгүүрийн дууг гаргахыг оролдохгүйгээр цахилгаан моторын жинхэнэ чимээг нэмэгдүүлэх боломжтой гэжээ.

Ferarri компани Италийн Маранелло хотод жилд 20 мянган бүтээгдэхүүн үйлдвэрлэх хүчин чадалтай цахилгаан автомашины үйлдвэрийг 3-4 сарын дараа нээхээр бэлтгэж байна.