Зах зээл 3 өдөр дараалан унаж буйн шалтгаан 

Дэлхийн хөрөнгийн зах зээл болон газрын тосны үнэ гурав дахь өдрөө дараалан уналаа. Харин аюулгүй хөрөнгө оруулалтад тооцогддог АНУ-ын Засгийн газрын бонд, Японы иений эрэлт нэмэгджээ. Энэ нь эдийн засгийн өсөлт удааширч магадгүй гэсэн болгоомжлолыг нэмж байна.  

Шинжээчид газрын тосны үнэ 1%-иар буурсан шалтгааныг эрэлт багасна гэсэн айдсаас үүдэлтэй гэж үзэж байна. 

Өнгөрсөн сард АНУ-ын Засгийн газрын бондын өгөөж буурч, хөдөлмөрийн зах зээл суларч байгаа шинж тэмдэг ажиглагдаж байна.  

Тухайлбал, АНУ-ын шинэ ажлын байрны тоо сүүлийн 3 жилийн хамгийн бага түвшинд хүрсэн нь зах зээлийн уналтыг дэмжиж байна. 

АНУ-ын үйлдвэрлэлийн мэдээ сул гарсан учраас мягмар гарагт Уолл Стритийн гол индексүүд оны эхнээс хойших хамгийн өндөр уналтыг үзүүллээ.  Лхагва гарагт хөрөнгө оруулагчид эдийн засгийн тодорхой мэдээллийг хүлээж байсан ч S&P 500 индекс хэлбэлзсээр эцэст нь унаж хаагдсан юм. 

Тэгвэл баасан гарагт зарлагдах АНУ-ын ажлын байрны тайлан нь эдийн засгийн өнөөгийн нөхцөл байдал, Холбооны нөөцийн сан ямар бодлогын хүү барих зэргийг  шийдвэрлэх гол үзүүлэлт болох хүлээлттэй байна.