Трампын хоёр дахь тангараг өргөх ёслолын эргэн тойронд  

АНУ-ын 47 дахь ерөнхийлөгчөөр сонгогдсон Дональд Трампын тангараг өргөх ёслолын 4 өдрийн хөтөлбөр зарлагдлаа.

Энэхүү хөтөлбөрт Трампын Вашингтоны ойролцоох хувийн гольфийн клубт зохион байгуулах гурван тусгай арга хэмжээ, нэг баярын MAGA цугларалт тусгагдсан байна.  

Өмнөх ерөнхийлөгчдийн ёслолын арга хэмжээнүүдтэй харьцуулахад, Трампын тангараг өргөх ёслол нь асар өндөр зардалтай ч харьцангуй цомхон хүрээнд, даруухан зохион байгуулагдахаар байна. 

Санхүүжилт, арга хэмжээний цар хүрээ 

Трампын хоёр дахь тангараг өргөх ёслолын санхүүжилт 170 сая ам.доллароос давж 200 сая ам.долларт хүрэх төлөвтэй байна.

Гэхдээ тус ёслолд оролцох хүмүүсийг тоог хязгаарлаж, харин Вашингтоны эргэн тойронд илүү олон арга хэмжээ зохион байгуулахаар төлөвлөжээ.  

Бизнесийн дэмжлэг ба хандив

Трампын ёслолд олон сая ам.долларын хандив өгсөн бизнесүүдийн тоо нэмэгдсээр байна. Өмнө нь түүнтэй таарамж муутай байсан зарим томоохон технологийн компаниуд, тухайлбал Amazon, Meta зэрэг компани шинэ засагт эерэг хандлагатай байгаагаа илэрхийлж хандив өргөжээ.

Мөн зохион байгуулалтын багаас дор хаяж 1 сая ам.долларын хандив өгөхийг уриалж, хариуд нь ерөнхийлөгч болон дэд ерөнхийлөгчтэй шууд уулзах боломжийг санал болгож байгаа аж.