Б.Лхагвасүрэн: Инфляц 2 орон руу орвол бодлогын хүүг өсгөх шаардлага үүснэ

Монголбанкны Ерөнхийлөгч Б.Лхагвасүрэн гадаад орчны эрсдэл, төлбөрийн тэнцэл, инфляцын төлөвийн талаар дараах байр суурийг илэрхийллээ.

АНУ, БНХАУ-ын худалдааны маргааны нөлөө

• АНУ-аас БНХАУ-ын зарим бараанд 10%-ийн гаалийн татвар ногдуулссан нь Монгол Улсын эдийн засагт дарамт үүсгэх эрсдэлтэй. Монголын экспортын 90% нь БНХАУ руу хийгддэг тул Хятадын эдийн засгийн өсөлт удааширвал экспортын орлого багасах магадлалтай.

Нүүрсний экспортын төлөв

• БНХАУ нь АНУ-аас коксжих нүүрс импортлохоо бууруулсан ч Монгол Улсын экспорт өсөх эсэх нь тодорхойгүй. Тус улс жилд 70 сая тонн коксжих нүүрс хэрэглэдэг бөгөөд Монголоос 30 гаруй сая тонныг импортолдог. Гэхдээ худалдааны маргаан үргэлжилбэл Хятадын эрэлт буурч, нүүрсний үнэ дарамтад орж болзошгүй.

Төлбөрийн тэнцэл, валютын урсгал

• Монгол Улсын 2024 оны төлбөрийн тэнцэл 622 сая ам.долларын ашигтай гарсан ч өмнөх оноос 2 дахин буурсан. Импортын өсөлт (26%) экспортыг (4%) давсан нь валютын гадагшлах урсгалыг нэмж, урсгал тэнцлийн алдагдлыг өсгөж байна. Ялангуяа үйлчилгээний тэнцлийн алдагдал 3 тэрбум ам.долларт хүрээд байгаа юм.

Инфляцын төлөв

• Монгол Улсын 2024 оны инфляц 9%-д хүрсэнд импортын барааны үнийн өсөлт голлон нөлөөлжээ. Эрчим хүчний үнийн өсөлт (1.9 нэгж хувь) болон бусад хэрэглээний үнийн өсөлт инфляцыг хоёр оронтой тоонд хүргэх магадлалтай байна.Тиймээс Монголбанкнаас мөнгөний хатуу бодлогыг барьж, заавал байлгах нөөцийг нэмсэн. Хэрэв инфляц өндөр хэвээр байвал бодлогын хүүг өсгөх шаардлага үүснэ.

Эдийн засгийн бодлогын хэрэгцээ

• Нүүрсний экспортын өрсөлдөх чадварыг нэмэгдүүлэх: Тээврийн зардлыг бууруулахын тулд төмөр замын дэд бүтцийг сайжруулах
• Боомтын хүчин чадлыг нэмэгдүүлэх: Экспортын хэмжээг нэмэхийн тулд хилийн нэвтрэх чадварыг сайжруулах
• Эдийн засгийн төрөлжилт: Уул уурхайгаас хэт хамааралтай байдлыг бууруулж, хөдөө аж ахуй, аж үйлдвэрийг хөгжүүлэх
• Аялал жуулчлалын тэнцвэр: Дотоодын аялал жуулчлалыг дэмжих, иргэдийн гадагш чиглэсэн аяллын урсгалыг хязгаарлах хэрэгтэй гэсэн байр суурийг илэрхийллээ.