Монгол Улсын нүүрсний экспорт үнийн дүнгээр 38.6% буурчээ

БНХАУ-ын Гаалийн ерөнхий газрын мэдээлснээр Монгол Улс 2025 оны эхний 2 сард өмнөх оны мөн үеэс 2%-иар их буюу 10.7 сая тонн нүүрс экспортолжээ. Гэвч үнийн дүнгээр 38.6 хувиар бага буюу 800 сая ам.долларын экспортын орлого олсон.

Манай улс нүүрсний нийлүүлэлтээр өмнөх оны мөн үед ОХУ-ын дараа жагсаж байсан бол энэ онд 1 байр дээшилж 3-т бичигдэх боллоо.

Тодруулбал, БНХАУ 2025 оны 2 сард өмнөх оны мөн үеэс 1.1 хувиар бага буюу 73.7 сая тонн нүүрс импортолсны 14.5%-ийг Монгол Улс нийлүүлжээ.

Үүний араас Индонез болон Австрали орж байна.

Коксжих нүүрсний хувьд

БНХАУ 2025 оны эхний 2 сард өмнөх оны мөн үеэс 5.6 хувиар их буюу 18.8 сая тонн коксжих нүүрс импортолсон. Үүний 34.2 хувь буюу  6.4 сая тонныг Монгол Улс нийлүүлж тэргүүлэгчийн байр сууриа хадгалсан байна .

Гэсэн ч коксжих нүүрсний нийлүүлэлт өмнөх оноос даруй 25 хувиар буурч БНХАУ-ын импортод эзлэх хэмжээ 48.2 хувиас 34.2 хувь болтлоо буурчээ.

Олон улсын зах зээлд нүүрсний үнэ буурч байгаа нь манай улсын экспортын орлогыг бууруулж байна. Мөн хамгийн үнэтэйд тооцогддог угаасан коксжих нүүрсний борлуулалт муу байгаа нь экспортын орлого буурахад голлон нөлөөлж байна.

Монгол Улс нь коксжих нүүрсний чанар, үнэ, нийлүүлэлтийн байршил зэргээр бусад улстай өрсөлдөхүйц ч эхний 2 сарын тоон мэдээллээс үзэхэд борлуулалт дээр анхаарах шаардлагатай байна.

Учир нь тус хугацаанд БНХАУ-ын импортод эзлэх бусад улсын нийлүүлэлтийн хэмжээ (Монгол 48.2%-34.2%), (ОХУ 22.8%-28.1%), (Австрали 8.7%-13.9%), Канад (7.6%-11.2%) болж өөрчлөгджээ.

---------------------------

Данс нээх, арилжаанд оролцох:

https://trader.golomtcapital.com/

7012-1530