МУ-ын Засгийн газрын бондын арилжаа 8 жилийн дараа дотоодын зах зээлд эргэн ирлээ

2025 оны хоёрдугаар улирлаас эхлэн Засгийн газрын бонд дотоодын хөрөнгийн зах зээлд дахин гарч, Монголын хөрөнгийн биржээр дамжуулан нийт 60 тэрбум төгрөг босгохоор төлөвлөжээ. Энэ нь тус төрлийн үнэт цаас 2017 онд сүүлчийн удаа дотоодын зах зээлд гаргдсанаас хойших анхны дахин эргэн ирэлт бөгөөд тухайн онд нийт 631 тэрбум төгрөг амжилттай татан төвлөрүүлж байв.

Сүүлийн жилүүдэд гадаад зах зээл дээр төвлөрч, олон улсын бонд гаргах замаар санхүүжилт татаж байсан Засгийн газар энэ удаад хамгийн эрсдэл багатай, хөрөнгө оруулагчдын сонирхол өндөртэй гэж тооцогддог Засгийн газрын үнэт цаасыг дотоодын хөрөнгийн зах зээлээр дамжуулан санал болгохоор болсон нь зах зээлийн хөгжлийн хувьд эерэг хандлага гэж үзэж болно.

Эхний шатны арилжаа 2025 оны 4 дүгээр сарын 16-нд зохион байгуулагдах бөгөөд 10 тэрбум төгрөгийн хэмжээтэй бонд гаргахаар төлөвлөсөн байна. Цаашид энэ төрлийн арилжааг шат дараатайгаар нэмэгдүүлж, нийт 60 тэрбум төгрөгийг татан төвлөрүүлэх зорилготой байгаа нь төрөөс дотоодын зах зээлийг дэмжих бодлогын хэрэгжилтийн нэг илрэл гэж шинжээчид дүгнэж байна.