iPhone, Nvidia-г аварсан нь: Трампын тариф технологийн салбарыг тойров

АНУ-ын Ерөнхийлөгч Дональд Трампын засаг захиргаа ухаалаг гар утас, компьютер болон бусад электроникийн барааг түүний нэрлэсэн “харилцан хариу тариф”-аас чөлөөлсөн нь Apple Inc., Nvidia Corp. зэрэг дэлхийн технологийн үйлдвэрлэгчдэд томоохон хөнгөлөлт боллоо.

АНУ-ын Гааль, хилийн хамгаалах албанаас өнгөрсөн баасан гарагийн орой нийтэлсэн энэхүү жагсаалт нь Трампын БНХАУ-д ногдуулсан 125 хувийн тариф болон бусад бараг бүх улс оронд үйлчлэх 10 хувийн үндсэн тарифаас эдгээр бүтээгдэхүүнийг чөлөөлснөөр тарифын хамрах хүрээг хязгаарлажээ. Тодруулбал, ухаалаг гар утас, зөөврийн компьютер, хатуу диск, компьютерийн процессор, санах ойн чип зэрэг хэрэглээ өндөртэй, олон нийтэд түгээмэл эдгээр технологийн бараа АНУ-д ерөнхийдөө үйлдвэрлэгддэггүй юм.