АЙДАСТ АВТСАН ЗАХ ЗЭЭЛД АЛТ ГЯЛАЛЗЛАА

Хөрөнгө оруулагчид эрсдэлтэй зүйлээс зайлсхийж, үнэ нь тогтвортой, аюул багатай гэж тооцогддог хөрөнгө рүү мөнгөө чиглүүлж эхэлсэн. Түүний хамгийн тод жишээ нь — алт. Алтны үнэ түүхэндээ анх удаа унц нь 3,500 ам.долларт хүрч дээд амжилт тогтоов. Энэ нь АНУ, Хятадын худалдааны тодорхойгүй байдал, мөн дэлхий даяарх геополитикийн хурцадмал байдалтай холбоотой. Хүмүүс эрсдэлээс зугтааж, аюулгүй санагдах зүйлд хөрөнгөө хандуулж байна гэсэн үг.

АНУ-ын доллар ч бас энэ долоо хоногт суларсан. Худалдааны зөрчил нэмэгдэж, мөн АНУ-ын Төв банк болох Фед тун удахгүй хүүгээ бууруулах болов уу гэсэн таамаг ихсэж, долларын ханш сүүлийн 3 жилийн хамгийн доод түвшинд хүрлээ. Европын валют болох евротой харьцуулахад доллар суларч, EUR/USD 1.156 болж, харин иений эсрэг USD/JPY 140 гэсэн түвшинг доош давав.

Нөгөө талд, хэд хэдэн томоохон компаниуд ашиг орлогын тайлангаа гаргалаа. Alphabet буюу Google-ийн толгой компани энэ улиралд маш сайн үзүүлэлттэй ажилласан. Орлого нь 90.2 тэрбум ам.доллар болж, өнгөрсөн жилээс 12 хувиар өссөн байна. Ашиг нь бүр 46 хувиар өссөн бөгөөд нэгж хувьцаанд ногдох ашиг (EPS) нь 2.81 ам.доллар болсон. Google хайлт, YouTube-ийн сурталчилгаа, Google Cloud болон хэрэглэгчдийн захиалгын орлого энэ өсөлтөд гол нөлөө үзүүлжээ. Үүний зэрэгцээ компанийн ногдол ашиг ч 5 хувиар нэмэгдсэн байна.

Гэтэл Intel-ийн тайлан арай сул гарсан. Нийт орлого 12.7 тэрбум ам.доллар байсан ч өсөлт үзүүлээгүй, яг л өнгөрсөн жилийнх шиг. Ашгийн хувьд нэгж хувьцаанд 0.13 ам.доллар байсан ч дараагийн улирлын төлөв тааруухан — тэд ашиггүй ажиллана гэж мэдэгдсэн нь зах зээлийн итгэлийг бууруулсан. Тиймээс Intel зардлаа танах, бүтээмжээ сайжруулах төлөвлөгөөн дээр анхаарч эхэлжээ.

Tesla-ийн тайлан ч хүлээлтэд хүрсэнгүй. Автомашины орлого нь өмнөх жилээс 20 хувиар унасан. Үүний шалтгаан нь CEO Илон Маск-ийн улс төрийн үйл ажиллагаа хэрэглэгчдийн дургүйцэлтэй тулгарч, борлуулалтад нь нөлөөлсөнтэй холбоотой. Гэсэн ч Маск төрийн ажлаасаа бага багаар холдоно гэж амлаж, хямд үнэтэй шинэ Tesla болон бүрэн автомат жолоодлоготой загварууд төлөвлөгөөний дагуу явж байгаа гэж мэдэгдсэн. Үүнийг сонссон хөрөнгө оруулагчид найдвар тээж эхэлсэн бөгөөд Tesla-ийн хувьцаа тайлангийн дараах арилжаанд бараг 6 хувиар өссөн.

Энэ долоо хоногт АНУ-ын хамгийн том компаниудын 4 нь буюу Microsoft, Meta (Facebook), Amazon, Apple тайлангаа зарлана. Мөн Visa, эмийн том компани Eli Lilly зэрэг олон чухал байгууллагын мэдээлэл гарна. Европын талаас ING банк, Banco Santander, мөн Mercedes-Benz, Volkswagen зэрэг автомашины том компаниудын тайлан ирнэ.

Үүнээс гадна эдийн засгийн хувьд маш чухал нэгэн мэдээ болох — АНУ-ын хөдөлмөрийн зах зээлийн тайлан (ажлын байрны үзүүлэлт) гарах бөгөөд энэ нь Федийн шийдвэр, хөрөнгө оруулагчдын итгэлд шууд нөлөөлнө.