PALANTIR-ИЙН ХУВЬЦАА $130 ХҮРЧ, ОГЦОМ ӨСЛӨӨ

Palantir AI програм хангамжийн эрэлт нэмэгдэж, 2025 оны орлогын таамгаа дахин нэмэгдүүллээ. АНУ-ын арилжааны зах зээл дэх хиймэл оюун ухаанд суурилсан програм хангамжийн эрэлт хурдацтай өсч байгаатай холбогдуулан Palantir Technologies (PLTR) компани 2025 оны орлогын төлөвөө нэмэгдүүлснээ мэдэгдлээ. Тус компанийн шинэчилсэн таамаглалд дурдсанаар, 2025 оны нийт орлого 3.89 тэрбум ам.доллараас 3.9 тэрбум ам.долларын хооронд байх төлөвтэй байна. Энэ нь өмнөх 3.75 тэрбум ам.долларын таамгаас өндөр байгаа бөгөөд тэр нь ч өөрөө Уолл Стрийтийн хүлээлтээс давж байжээ.

Palantir-ийн өсөлтийн гол хөшүүрэг нь АНУ-ын арилжааны сегмент болж байгаа бөгөөд энэ салбарын орлого 2025 онд 1.18 тэрбум ам.долларт хүрэхээр байна. Энэ нь өмнө нь тооцоолж байсан 1.08 тэрбум ам.доллароос өссөн үзүүлэлт бөгөөд жилийн дүнгээр 68%-ийн өсөлт үзүүлэх төлөвтэй байна.

Тус компанийн гол үйлчлүүлэгчдийн дунд Mount Sinai эмнэлэг, Cleveland Clinic, эрчим хүчний аваргууд болох BP, Exxon, мөн автомашины салбарын Stellantis зэрэг нэр хүндтэй байгууллагууд багтсан нь Palantir-ийн хиймэл оюун ухаанд суурилсан шийдлүүд эрүүл мэнд, эрчим хүч, автомашин зэрэг салбаруудад өргөнөөр нэвтэрч буйг илтгэж байна.

Palantir хиймэл оюун ухааны зах зээлийн өрсөлдөөн ширүүсч буй энэ үед уламжлалт батлан хамгаалах чиглэлээсээ хальж, арилжааны салбарт гүнзгийрэн орж байгаагаараа онцлог болж байна.