Видео тоглоомын борлуулалт нэмэгдэж Tencent-ийн ашиг өслөө

Хятадын технологийн аварга Tencent компанийн орлого 2025 оны 2-р улиралд 15 хувиар өсөв. Үүнд, хиймэл оюун ухаанд оруулсан томоохон хөрөнгө оруулалт болон тоглоомын бизнесийн амжилт голлон нөлөөлжээ.

Тайлант хугацаанд компанийн орлого 184.5 тэрбум юань буюу 25.7 тэрбум ам.долларт хүрсэн нь өмнөх оны мөн үеийн 161.1 тэрбум юаниас мэдэгдэхүйц өссөн үзүүлэлт юм. Үйл ажиллагааны ашиг нь 57.31 тэрбумаас 63.05 тэрбум юань болж нэмэгджээ.

Өсөлтийн гол хөдөлгөгч: Тоглоомын бизнес

Тоглоомын бизнес нь компанийн өсөлтийн гол хөдөлгөгч хэвээр байна.

• Дотоодын тоглоомын орлого: 17 хувиар өсөж 40.4 тэрбум юаньд хүрэв. Энэ нь шинээр гаргасан “Delta Force” болон “Honor of Kings”, “VALORANT”, “Peacekeeper Elite” зэрэг олон жил алдартай байгаа тоглоомуудын өндөр борлуулалтаас үүджээ.

• Олон улсын тоглоомын орлого: 35 хувиар өсөж 18.8 тэрбум юаньд хүрсэн. Үүнд “PUBG Mobile” болон шинээр гарсан “Dune: Awakening” зэрэг тоглоомын орлого нөлөөлжээ.

Бусад салбарын амжилт

Мөн зар сурталчилгаа, Weixin экосистемийн орлого ч мэдэгдэхүйц нэмэгдсэн байна. Тухайлбал, хиймэл оюун ухаан ашигласан зар сурталчилгааны платформ болох Weixin-ий төлбөрийн системийг шинэчилснээр маркетинг үйлчилгээний орлого 20 хувиар өсөж 35.8 тэрбум юаньд хүрсэн байна.

Ирээдүйн зорилт: Олон улсын зах зээл

Компани нь Европын үүлэн технологийн (cloud technology) зах зээлд нэвтэрч, Amazon, Microsoft, Google зэрэг дэлхийн тэргүүлэгчидтэй өрсөлдөхөөр зэхэж буй нь олон улсын өрсөлдөх чадварыг нэмж буй томоохон алхам болж байна.