Арванхоёрдугаар сард хүү бууруулах магадлал огцом өсөв

Хөрөнгийн зах зээлийн сүүлийн үеийн өсөлтөд Холбооны Нөөцийн Сан (ХНС) ирэх сард дахин бодлогын хүүгээ бууруулна гэсэн хүлээлт голлон нөлөөллөө.
CME FedWatch-ийн сүүлийн үеийн мэдээллээр, зах зээл 12-р сарын 9–10-ны өдрүүдэд болох хурлаар ХНС хүүг 25 суурь нэгжээр бууруулах магадлалыг 77.2% гэж тооцоолж байна. Энэ нь өнгөрсөн долоо хоногт дөнгөж 41.8% байсантай харьцуулахад эрс өссөн үзүүлэлт юм.

Жон Уильямсын мэдэгдэл
Хүлээлт ийнхүү огцом өсөхөд Нью-Йоркийн Федийн Ерөнхийлөгч Жон Уильямсын мэдэгдэл чухал түлхэц болов. Тэрбээр төв банк хөдөлмөрийн зах зээлийг дэмжихийн тулд ойрын хугацаанд хүүг бууруулах боломжтой хэвээр байгааг онцолсон юм.
Энэ долоо хоногт 9-р сарын хойшлогдсон эдийн засгийн гол үзүүлэлтүүд зарлагдах хуваарьтай байна:

• Мягмар гараг: Аж үйлдвэрийн үйлдвэрлэл, Үйлдвэрлэгчийн үнийн индекс (PPI), Бөөний болон жижиглэнгийн борлуулалт.

• Лхагва гараг: ХНС-ийн хамгийн их анхаардаг PCE инфляцын индекс.

Гэсэн хэдий ч нэг томоохон эрсдэл бий. Төрийн байгууллагын үйл ажиллагаа зогсох (government shutdown) эрсдэлээс үүдэн 10-р сарын инфляц болон хөдөлмөрийн зах зээлийн статистик гарахгүй байх магадлалтай. Хэрэв тэгвэл ХНС 12-р сарын шийдвэрээ "мэдээллийн хомсдолтой" буюу тодорхой бус нөхцөлд гаргахад хүрч болзошгүй юм.