OpenClaw-ийн хэрэглээ Хятадад шинэ AI тренд болж байна

Хятад улс хиймэл оюуны хэрэглээг нийгмийн бүх түвшинд нэвтрүүлэх бодлогоо эрчимжүүлж, OpenClaw нэртэй AI туслах хэрэгслийн хэрэглээ хурдацтай нэмэгдэж байна. Австрийн хөгжүүлэгчийн бүтээсэн уг AI агент нь компьютер дээрх олон төрлийн ажлыг хүний оролцоогүйгээр гүйцэтгэх чадвартай бөгөөд богино хугацаанд “виртуал туслах”-ын шинэ тренд болон өргөжиж байна.

Тус улсын технологийн тэргүүлэгч компаниуд болох Baidu болон Tencent OpenClaw-ийг олон нийтэд түгээх зорилгоор сургалт, танилцуулга, суурилуулалтын арга хэмжээнүүдийг идэвхтэй зохион байгуулж байна. Эдгээрт оюутан, албан хаагчдаас гадна ахмад настнууд ч оролцож, AI хэрэгслийг өдөр тутмын хэрэглээндээ нэвтрүүлж эхэлжээ.

OpenClaw-ийн гол боломжууд:

• Интернет хайлт гүйцэтгэх
• Онгоцны тасалбар захиалах
• Бусад AI системүүдийг удирдах
• Ажлын олон шат дамжлагыг автоматжуулах

Ийнхүү AI-д суурилсан “нэг хүний бизнес” загвар Хятадад эрчимтэй дэлгэрч, ганц хэрэглэгч маркетинг, санхүү, захиргаа зэрэг олон чиг үүргийг зэрэг удирдах боломж бүрдэж байна. Энэ нь Хятадын засгийн газрын урт хугацааны зорилттой нийцэж байгаа бөгөөд 2030 он гэхэд хиймэл оюуныг эдийн засгийн гол салбаруудын 90 гаруй хувьд нэвтрүүлэх стратегийн хүрээнд хэрэгжиж буй алхмуудын нэг юм.

Гэсэн хэдий ч энэхүү хөгжлийг дагасан эрсдэлүүд мөн анхаарал татаж байна. Тухайлбал, хэрэглэгчийн өгөгдлийн аюулгүй байдал, AI-ийн хяналтгүй шийдвэр гаргалт зэрэг асуудлаас үүдэн эрх баригчид зарим салбарт, ялангуяа банк санхүү болон төрийн байгууллагуудад OpenClaw-ийн хэрэглээг хязгаарлах чиглэлд анхааруулга өгч эхэлжээ.