АНУ-ын инфляц 6 хувь болж буурчээ

Мягмар гарагийн арилжаагаар АНУ-ын хувьцаанууд өссөн нь инфляц буурч, банкны салбар дахь дампуурлын "халдвар" намжсантай холбоотой байлаа. Иймд Холбооны нөөцийн сан ирэх долоо хоногт бодлогын хүүг хүчтэй нэмэгдүүлнэ гэсэн хүлээлт буураад байна. 

АНУ-ын Хөдөлмөрийн Статистикийн Хорооны мэдээлснээр хэрэглээний үнийн индексийн сарын өсөлт 2 дугаар сард 0.4 хувь хүрсэн нь 1 дүгээр сарын 0.5 хувиас буурсан үзүүлэлт юм.

Жилийн инфляц өмнөх сартай харьцуулахад 0.4 хувиар буурч 6.0 хувь болжээ. Энэ нь инфляцын түвшин өнгөрсөн оны 6 дугаар сард есөн хувь давсантай харьцуулахад гуравны нэгээр буурсан дүн юм.  

Инфляц буурахад гол нөлөө үзүүлсэн салбар нь эрчим хүч болон хуучин автомашины борлуулалтын зах зээл дээр дефляц ажиглагдсантай холбоотой байжээ. Харин суурь инфляц 2 дугаар сард 0.5 хувь гарсан нь нэгдүгээр сартай харьцуулахад 0.1 нэгжээр өссөн дүн юм.  

Хүнсний бүтээгдэхүүний үнийн өсөлт өндөр хэвээр байгаа нь төв банкны гол асуудал болж байгаа бөгөөд өрхийн хэрэглээний хүнсний бүтээгдэхүүний үнэ өнгөрсөн оны мөн үеэс 10.2 хувиар өндөр байгаа юм.