Micron-д Хятад улс шалгалт оруулсан ч үйл ажиллагаагаа хэвийн гэв

Даваа гарагт Micron Technology Inc (NASDAQ:MU)-аас Хятадын засгийн газар тус компанид цахим аюулгүй байдлын хяналт шалтгалт оруулсан ч Хятад дахь үйл ажиллагаа нь хэвийн явагдаж байгаа талаар мэдээллээ. 

“Micron-ий бүтээгдэхүүний тээвэрлэлт, инженерчлэл, үйлдвэрлэл, борлуулалт болон бусад үйл ажиллагаа хэвийн үргэлжилж байна” хэмээн компанийн мэдэгдэлд цохон тэмдэглэжээ. 

Өнгөрсөн долоо хоногт Хятадын Цахим орчны зохицуулах газраас Micron-ий бүтээгдэхүүнүүдийг шинжилж, аюулгүй байдлын шалгалт хийхээр болсноо мэдэгдсэн юм. 

Ажиглагчид үүнд “АНУ-Хятадын хооронд гүнзгийрч буй хагас дамжуулагчийн технологитой холбоотой маргааны хөлд компаниуд чирэгдэж байна” гэсэн дүгнэлт хийж байгаа юм.