ECB бодлогын хүүг 25 суурь нэгжээр өсгөсөн нь түүхэн дээд түвшинд ойртлоо

Европын орнуудын эдийн засаг суларч байгаа ч бодлого боловсруулагчид инфляцийн өсөлтийг зохицуулахын тул бодлогын хүүг өсгөж 2008 оноос хойших хамгийн өндөр түвшинд хүргэв.

Ингэснээр өнгөрсөн оны эхнээс 10 дахь удаагаа бодлогын хүүг өсгөж байна. Европын төв банкнаас /ECB/ “Хэдийгээр одоо инфляци буурч байгаа ч цаашид хэт өсөх төлөвтэй хэвээр байна" гээд үнийн өсөлтийг дунд хугацаанд 2%-д хүргэх зорилтоо дахин илэрхийлэв.

Учир нь үйлдвэрлэл, зээл олголт буурч, үйлчилгээний салбар хүндрэх эхний шинж тэмдгүүд илэрч байгаа тул тус бүс нутаг эдийн засгийн уналтад орж магадгүй байгаа юм.

Евро бүсийн инфляци одоогоор ECB-ийн зорилтот 2% -иас 2 дахин их байна.

Евро бүсийн эдийн засагт мөнгөний хатуу бодлого, дэлхийн төв банкнуудын ижил төстэй бодлогын өөрчлөлт, Хятадын эдийн засаг суларсан зэрэг нь нөлөөлж байна.