ОПЕК+ ээлжит хурал хойшилж газрын тосны үнэ уналаа.

Нефть экспортлогч орнуудын нэгдсэн байгууллага, ОХУ болон түүний холбоотнууд газрын тосны олборлолтыг бууруулах эсэх асуудлыг ойрын хугацаанд хэлэлцэхээр төлөвлөж байсан ч тус хурал 11 сарын 30 хүртэл хойшиллоо.

Эх сурвалжууд 11 сарын 26-нд болох байсан уулзалтын өмнө үйлдвэрлэгчид олборлолтын хэмжээгээ тохиролцож чадаагүй хэмээн мэдээлж байсан юм.

Тодруулбал, ОПЕК+-ийн гишүүн Африкийн орнууд болох Ангол, Нигери улсууд газрын тосны гарцаа нэмэгдүүлэхээр зорьж байгаа нь санал зөрөлдөх шалтгаан болжээ. 

Тиймээс ОПЕК+ ирэх жил олборлолтоо бууруулахгүй байх гэсэн хүлээлтэд үндэслэн газрын тосны ханш 1 хувиар унаад байна. 

Брент нефтийн фьючерс 68 цент буюу ойролцоогоор 0.8%-иар буурсан бол АНУ-ын баруун Техасын түүхий нефтийн үнэ 1%-иар буурч 76.35 ам.долларт хүрэв.