АНУ Ормузын хоолойд гацсан хөлгүүдийг гаргах “Project Freedom” ажиллагааг эхлүүлнэ

Доналд Трамп Ормузын хоолойд гацсан иргэний хөлөг онгоцуудыг гаргах “Project Freedom” ажиллагааг эхлүүлэхээ мэдэгдлээ. Энэхүү алхам нь бүс нутгийн хурцадмал байдал үргэлжилж буй энэ үед дэлхийн худалдааны чухал гарцыг хэсэгчлэн сэргээх зорилготой юм.

Тодруулбал, дайнд оролцоогүй орнуудын тугтай, энгийн ачааны хөлөг онгоцуудыг хамрах бөгөөд олон зуун хөлөг, мянга мянган далайчид хоёр сар орчим хугацаанд хоолойд гацсан хэвээр байгаа юм. Эдгээр хөлгүүдийг АНУ-ын тэнгисийн цэргийн хүчин дагалдан хамгаалж, аюулгүй бүс рүү гаргах төлөвтэй байна.

Пентагоны мэдээлснээр уг ажиллагаанд байлдааны хөлөг онгоц, 100 гаруй нисэх хэрэгсэл, дрон болон 15,000 орчим цэргийн алба хаагч оролцох бөгөөд зөвхөн хүмүүнлэгийн шинжтэй бус, стратегийн ач холбогдолтой алхам гэж үзэж байна.

Гэсэн ч энэ нь АНУ Иранд тавьсан далайн бүслэлтийг зогсоож буй хэрэг биш юм. Харин бүслэлтийг хэвээр хадгалсан нөхцөлд, зөвхөн тодорхой хөлгүүдийг өөрийн хамгаалалтад гаргах оролдлого гэж шинжээчид үзэж байна.

Нөхцөл байдал эмзэг хэвээр байгаа нь ажиллагааны эрсдэлийг нэмэгдүүлж байна. Трампын мэдэгдлийн дараа удалгүй нэг танкер үл мэдэгдэх довтолгоонд өртсөн байна. Иран одоогоор тээвэрлэлтийг хаасан хэвээр байгаа бөгөөд АНУ-ын энэхүү ажиллагаанд хэрхэн хариу үзүүлэх нь тодорхойгүй байна.