Sell in May and Go Away

5-р сарын арилжаа эхэлж буйтай зэрэгцэн хөрөнгө оруулагчдын дунд эртний нэг хэллэг дахин сөхөгдөж байна. Энэ нь “Sell in May and go away” буюу 5-р сард хувьцаагаа зараад намар хүртэл зах зээлээс түр гарах стратеги юм. Уламжлалт ойлголтоор зуны саруудад арилжааны идэвх суларч, өгөөж багасдаг гэж үздэг.

Гэвч 2026 онд энэ дүрэм өмнөх шигээ ажиллахгүй байх нөхцөл бүрдэж байна.

4-р сар дэлхийн гол зах зээлүүдэд маш хүчтэй өнгөрлөө. Европын STOXX 600 болон Германы DAX индексүүд сүүлийн нэг жил гаруйн хамгийн сайн сарын үзүүлэлтээ харуулсан бол Италийн FTSE MIB бараг 9%-иар өсөж, 2023 оноос хойших хамгийн хүчтэй өсөлтөө үзүүлэв. АНУ-д ч мөн S&P 500 болон Nasdaq Composite зургаан жилийн хамгийн өндөр сарын өсөлтөө бий болголоо.

Зах зээл ийм хүчтэй байгаагийн нэг шалтгаан нь геополитикийн эрсдэлийг үл харгалзан эдийн засаг, компанийн ашиг орлого тогтвортой хэвээр байгаа явдал юм. Мөн Ирантай холбоотой зөрчил намжрах боломж нэмэгдвэл хувьцааны зах зээлд эерэг нөлөө үзүүлнэ гэж хөрөнгө оруулагчид үзэж байна.

Гэхдээ эрсдэл бүрэн арилсангүй. Federal Reserve-ийн тэргүүн Жером Пауэлл инфляц өндөр хэвээр байгааг анхааруулсан билээ. Иймээс энэ 5-р сард хөрөнгө оруулагчид хуучин дүрэм дагах уу, эсвэл шинэ нөхцөл байдалд уян хатан хандах уу гэсэн сонголтын өмнө ирээд байна. Одоогийн зах зээлийн дүр зургийг харвал “Sell in May” гэх уламжлалт зөвлөгөө өмнөх шигээ найдвартай биш болсон байна.