Цөөн хэдхэн хувьцааны өсөлт зах зээлд эрсдэлийг бий болгож байна.

АНУ-ын хөрөнгийн зах зээл шинэ дээд түвшинд хүрсэн ч зах зээлийн өсөлт маш цөөн тооны хувьцаанд төвлөрч байгаа нь 2000 оны дотком хөөс хагарахын өмнөх үеийг санагдуулж байна гэж шинжээчид анхааруулж байна.

5-р сарын сүүлийн арилжааны өдөр S&P 500 индекс түүхэн дээд түвшинд хаагдсан боловч индексийн 500 компаниас ердөө 20 нь л шинэ дээд ханш тогтоожээ. Үүнээс зөвхөн 7 компани нь хиймэл оюун ухаантай шууд холбоогүй байсан бол үлдсэн нь AI болон хагас дамжуулагчийн салбарын компаниуд байв. Энэ үзэгдэл нь 2000 оны 3-р сард интернэтийн хөөс оргилдоо хүрэх үед мөн адил ердөө 20 орчим хувьцаа зах зээлийг чирч байсан нөхцөлтэй төстэй байдал ажиглагдаж байна.

Тухайлбал, Advanced Micro Devices 5-р сард 46%, Micron Technology 88%, Samsung Electronics 44%, SK Hynix 81%-иар тус тус өсчээ. Үүний үр дүнд технологийн хувьцаанд төвлөрсөн Nasdaq Composite индекс 4 болон 5-р сард нийлээд 25%-иар өсч, сүүлийн 20 гаруй жилийн хамгийн хүчтэй хоёр сарын өсөлтөө үзүүлсэн байна.

Гэвч олон шинжээчид энэхүү өсөлт нь эрүүл өсөлт биш гэж үзэж байна. Учир нь зах зээлийн нийт компаниудын дийлэнх нь өсөлтөд оролцохгүй байгаа бөгөөд зөвхөн цөөн хэдэн AI хувьцаа индексийг дээш татаж байгаа юм. 

Шинжээчдийн үзэж байгаагаар зах зээл хэдийгээр шинэ оргилд хүрч байгаа ч өсөлт хэт төвлөрсөн хэвээр байвал энэ нь ирээдүйн засвар хөдөлгөөн эсвэл томоохон уналтын эрсдэлийг нэмэгдүүлдэг.