Украин ОХУ-ын эдийн засгийн гол объектуудыг онилж байна

Украин өнгөрсөн шөнө ОХУ-ын хэд хэдэн бүс нутагт алсын тусгалтай дроны томоохон цохилт өгч, Самара муж дахь ОХУ-ын хамгийн том онлайн худалдааны платформ болох Wildberries-ийн агуулах, мөн аж үйлдвэрийн болон эрчим хүчний хэд хэдэн байгууламжийг ониллоо.

Украины талын мэдээлснээр тус улсын хүчин Саратовын газрын тос боловсруулах үйлдвэр, Энгельсийн цэргийн нисэх бааз, мөн Калуга мужийн газрын тосны агуулах руу цохилт өгсөн байна. Сүүлийн өдрүүдэд Украин ОХУ-ын эдийн засаг, ложистикийн дэд бүтцэд чиглэсэн ажиллагаагаа эрчимжүүлж байгаа юм.

Үүний хариуд ОХУ Николаев боомтын цэргийн дэд бүтэц болон Хар тэнгист цэргийн ачаа тээвэрлэж явсан хөлөг онгоцуудыг цохилтод оруулсан гэж мэдэгдэв. Хоёр талын стратегийн болон эрчим хүчний дэд бүтцэд чиглэсэн довтолгоо үргэлжилсээр байгаа нь мөргөлдөөн ойрын хугацаанд намжих төлөвгүй байгааг харуулж байна.