Японы төв банкны бодлогын хүү 31 жилийн дээд түвшинд хүрлээ

Японы төв банк бодлогын хүүгээ 25 суурь нэгжээр нэмэгдүүлж, 1.25%-д хүргэлээ. Ингэснээр тус улсын бодлогын хүү 1995 оноос хойших хамгийн өндөр түвшинд хүрч байна.

Энэ удаагийн шийдвэрийг 7-2 саналын харьцаагаар баталсан бөгөөд хоёр гишүүн хүүг хэвээр хадгалах санал өгчээ. Өмнөх хүүгийн өсөлтөөс ердөө 3 сарын дараа дахин хүү нэмэгдүүлсэн нь Японы төв банк мөнгөний бодлогоо илүү эрчимтэй чангаруулж байгааг харуулж байна.

Төв банк хүүг нэмэгдүүлэх гол шалтгаанаар инфляц 2%-ийн зорилтот түвшнээс давж өсөх эрсдэл нэмэгдсэн гэж үзсэн байна. Тухайлбал, Японы наймдугаар сарын ерөнхий инфляц 1.9%, суурь инфляц 1.7% байжээ.

Мөн АНУ Японы мөнгөний бодлогыг чангаруулах үйл явцыг үргэлжлүүлэхийг дэмжиж байгаа бөгөөд АНУ-ын Сангийн сайд Скотт Бессент энэ сарын эхээр төв банкны ерөнхийлөгч Казүо Уэдад валютын ханшийн хэлбэлзлээс сэргийлэхийн тулд шийдвэртэй мөнгөний болон зах зээлийн арга хэмжээ авах шаардлагатайг онцолсон байна.