Цагийн өмнө Хонгконгийн шинэ удирдлагууд эх газрын дарга Ши Жиньпинийн өмнө “нэг улс хоёр систем”-ийг хүндэтгэж тусгай захиргааны бүсийн хуулийн дагуу Хонгконг болон эх газрын төлөө хүчин зүтгэхээ тангаргалаа

2022 оны 07 сарын 01 өдөр Хонгконг тусгай захиргааны бүсийн хувьд Их Британийн захиргаанаас гарч эх газарт эргэн ирсэн чухал өдрүүдийн нэг бөгөөд эл өдөр Хонгконгийн шинэ захирагчаар хуучин аюулгүй албаны дарга Жон Ли Хонгконгийн захирагчын тангаргаа өргөж бусад удирдах албан тушаалтнууд мөн адил тангараг өргөж байна.

Жон Ли нь 2019 онд Хонгконгт иргэний ардчилсан хөдөлгөөний жагсаал цуглаануудын үед аюулгүй байдлын албыг удирдаж байсан бөгөөд 5 сарын 30 өдөр Жон Ли нь сонгуулийн хорооны 90 хувийн саналаар Хонгконгийн дараагийн захирагчийн албан тушаалд сонгогдож Бээжингээс баярын бичиг авч байсан Бээжингийн үнэнч гэж хэлж болох улс төрчдийн нэг юм.

Ши Жиньпин уг тангараг өргөх ёслол дээр Хонгконгийн тусгай захиргааны бүс “Нэг улс хоёр систем” нь сүүлийн 25 жилийн хугацаанд олон сорилтуудыг туулж батлагдсан оновчтой бодлого бөгөөд тус бодлогыг өөрчлөх бодол огтхон ч байхгүйгээ илэрхийлж БНХАУ-ын үндсэн тогтолцоо болох социалист тогтолцоог хүндэтгэхийг Хонгконгчуудаас хүслээ.

07 сарын 01-ний баярын өдөртэй холбоотой өнөөдөр Хонгконгийн хөрөнгийн бирж амарч байна.