“Buy America” эргэн ирж байна уу?

Макро нөхцөл байдал эерэг чиглэлд шилжив: Геополитикийн эрсдэл буурч, хиймэл оюун ухааны өсөлт дахин хүчээ авч, худалдааны хэлэлцээр болон Холбооны Нөөцийн Сан (ХНС)-ийн мөнгөний зөөлөн бодлогын хүлээлт зэрэг нь АНУ-ын хөрөнгийн зах зээлийг дээд түвшинд хүргэв.

Зах зээл өсөж байна. Гэхдээ жигд биш: Өсөлтөд технологийн салбараас гадна бусад салбарууд ч оролцож эхэлсэн. Гэсэн ч хэрэглээ, эрүүл мэндийн салбарууд хоцрогдож байгаа нь өсөлтийн бат бөх байдалд эргэлзээ төрүүлж байна.

7 сард бүх асуудлыг эцэслэж магадгүй: Худалдааны хэлэлцээрийн эцсийн хугацаа, компаниудын тайлангийн улирал, гол макро өгөгдлүүд зэрэг нь энэ өсөлтийг бататгах эсвэл эрсдэлд оруулж болзошгүй.

АНУ-ын зах зээлийн өсөлтийг хөтөлсөн 5 хүчин зүйл

1. Геополитикийн дарамт суларсан
Ойрх Дорнод дахь хурцадмал байдал намжиж, газрын тосны үнэ буурч, инфляцын хүлээлт намдсан нь нөлөөлсөн. Энэ нь хөрөнгө оруулагчдад зах зээлийн суурь үзүүлэлтүүдэд төвлөрөх боломжийг олгож байна.

2. Худалдааны өөдрөг хандлага сэргэв
АНУ, Европын Холбоо болон БНХАУ-ын хооронд худалдааны хэлэлцээ урагшилж, 7 сарын 9-ний эцсийн хугацааг сунгах боломжтой гэж үзэж байна. Шинэ тариф зарлагдаагүй байгаа нь үйлдвэрлэл, нийлүүлэлтийн сүлжээний компаниудад эерэг дохио өгч байна.

3. Хиймэл оюун ухаан дахин эрч хүч авлаа
AI-тэй холбоотой хүлээлт, бүтээмжийн өсөлт, дижитал шилжилтийн төсөлд хөрөнгө оруулагчид дахин идэвхтэй оролцож эхэлсэн нь зах зээлд эрсдэл хүлээх сонирхлыг нэмэгдүүлж байна.

4. Хүү бууруулах ХНС-ийн хүлээлт нэмэгдэж байна
Тарифтай холбоотой инфляцын дарамт байгаа ч Холбооны Нөөцийн Сан энэ жил дунд хугацаанд бодлогын хүүг бууруулах төлөвтэй хэвээр байна. Зах зээл “зөөлөн газардах” хувилбарыг үнэлж байгаа бөгөөд энэ нь хөрөнгийн үнэ цэнийн хувьд таатай орчин бүрдүүлж байна.

5. АНУ-ын эдийн засаг тэсвэртэй хэвээр
Хэрэглээ тогтвортой, хөдөлмөрийн зах зээл аажмаар хөрч байгаа ч нийт дүнгээрээ хүчтэй хэвээр байна. Инфляц буурч, ашиг орлогын үзүүлэлтүүд санхүү, үйлдвэрлэл, хэрэглээний зарим салбарт өндөр байна.

Дүгнэлт ба эрсдэл

АНУ-ын зах зээлийн өсөлт макро болон микро түвшинд олон талын дэмжлэгтэй ч, 7-р сарын үйл явдлууд (татварын бодлого, худалдааны хэлэлцээ, эдийн засгийн өгөгдөл, ашиг орлогын улирал) нь зах зээлийн хандлагыг өөрчлөх эрсдэлтэй байгааг үгүйсгэх аргагүй.

“Buy America” хандлага эргэн ирж байгаа ч тогтвортой үргэлжлэх эсэх нь тун удахгүй шийдэгдэнэ.