Nio, Xpeng, Li Auto цахилгаан автомашин үйлдвэрлэгчдийн 3 сарын автомашин нийлүүлэлтийн тоо өсжээ

БНХАУ-ын цахилгаан автомашин үйлдвэрлэгч Nio, Xpeng, Li Auto компаниуд автомашин нийлүүлэлтийн 2022 оны 3 сарын дүнгээ танилцуулав.

Хэдийгээр БНХАУ-д ковидын нөхцөл байдал хүндэрч, цахилгаан автомашины түүхий эдийн үнэ өссөний улмаас зарим компани автомашины үнээ нэмсэн ч АНУ-ын хөрөнгийн бирж дээр  эдгээр компанийн хувьцааны ханш өссөн юм.

Xpeng компанийн хувьд 3 сард хамгийн их буюу 15,414 ширхэг цахилгаан автомашиныг нийлүүлсэн байна. Энэ нь 2 дугаар сарын нийлүүлэлтээс 148 хувиар их юм. Тодруулбал тус компаний 1 дүгээр улирлын нийт автомашин нийлүүлэлт 34,561 болж өмнөх жилийнхээс 159 хувиар өсжээ.

Li Auto компанийн хувьд  3 сард 11,034 ширхэг Li One хэмээх спорт загварын автомашин худалдсан нь өмнөх сарынхаас 31 хувиар их байна. Ингэснээр 1 дүгээр улиралд нийт автомашин нийлүүлэлт 31,716 болж өмнөх жилийнхээс 152.1 хувиар өсжээ.

Nio компанийн хувьд  3 сард нийт 9,985 автомашиныг нийлүүлж, өмнөх сараас 62.8 хувийн өсөлтийг үзүүлэв. Ингэснээр эхний улирлын нийт цахилгаан автомашин нийлүүлэлтийн 25,768 болж өмнөх жилийнхээс 28.5 хувиар өссөн байна.