Онцлох нийтлэл Хятадын төв банкны түүхэнд тэмдэглэгдэх эдийн засгийн дэмжлэг 

Хятад улс энэ онд ДНБ-ээ 5%-д хүргэх зорилт тавьсан. Энэхүү зорилтод хүрэхийн тулд Төв банк буюу Ардын банкнаас их хэмжээний дүн бүхий бодлогын арга хэмжээг авах болсноо зарлалаа.

Ардын банкны хурлын шийдвэр:  

• Нөөцийн харьцааг бууруулах: Банкнуудын хадгалах ёстой мөнгөний хэмжээг илэрхийлдэг нөөцийн харьцааг (RRR) 50 суурь пунктээр бууруулахаар болжээ. Ингэснээр банкны системд илүү их хөрөнгө чөлөөлөгдөж, эдийн засагт илүү их мөнгө орох боломжийг олгоно.  

• Репо хүүгийн бууралт: Санхүүгийн системийн богино хугацааны хөрвөх чадварыг удирдах чухал хэрэгсэл болох 7 хоногийн репо хүүг 0.2 хувиар бууруулахаар болжээ.  Энэ нь  зээл авах нөхцөлийг хялбар болгоно. 

• Зээлийн жишиг хүүгийн бууралт: Төв банкны ерөнхийлөгч Пан “Зээлийн жишиг хүүг (LPR) 0.2-0.25%-иар бууруулах магадлалтай” гэжээ. Энэ нь аж ахуйн нэгжүүд болон иргэдийн зээл авах зардлыг бууруулна.  

• 5.3 их наяд ам.долларын ипотекийн зээлийн хүүг бууруулав. Үл хөдлөх хөрөнгийн салбарыг дэмжих зорилгоор 2 дахь орон сууц худалдан авахад  шаардагдах урьдчилгаа төлбөрийн доод хэмжээг бууруулах зэрэг бусад арга хэмжээг авч байна. 

• 800 тэрбум юань (114 тэрбум ам.доллар)-ын хөрвөх чадварын дэмжлэг үзүүлнэ: Брокер, хөрөнгө оруулалтын сангуудад төв банкны санхүүжилтээс ашиглан хувьцаа худалдан авах боломжийг олгохоор болжээ.  

Эрсдэлүүд 

5. Эдийн засгийн тогтворгүй байдал: Хятадын эдийн засгийн өсөлт удааширч буй үед эдгээр арга хэмжээ нь богино хугацаанд эдийн засгийг дэмжих ч урт хугацаанд хэт их мөнгөний нийлүүлэлтээс үүдэн инфляц өсөх, хөрөнгө оруулалтын хэт халалт үүсэх эрсдэлийг нэмж болзошгүй. 

6. Хадгаламжийн урсгал: Банкны нөөцийн харьцааг бууруулах нь банкнуудад зээл олгоход хялбар болох ч зээл олголт нэмэгдэх хэрээр хадгаламжийн урсгал буурах, санхүүгийн системд хүндрэл үүсгэх эрсдэл бий. 

7. Үл хөдлөх хөрөнгийн зах зээлийн эрсдэл: Хоёр дахь орон сууцны худалдан авалтад тавигдах шаардлагыг бууруулснаар их хэмжээний эрэлт үүсэж, үнийн өсөлт хэт хурдан явах магадлалтай. 

8. Худалдааны дайн гарах эрсдэл: Экспортод тулгуурласан зах зээлүүд нь гаалийн татвар нэмэгдэх эсвэл худалдааны маргаан хурцдах үед нийлүүлэлтийн сүлжээ тасалдаж, өрсөлдөх чадвар буурч болзошгүй. 

Өгөөжүүд 

1. Эдийн засгийн өсөлт: Эдгээр арга хэмжээ нь Хятадын эдийн засгийг сэргээж, хэрэглэгчдийн итгэлийг нэмэх, дотоодын эрэлтийг дэмжихэд ихээхэн нөлөө үзүүлэх боломжтой. 

2. Хөрөнгийн зах зээлийн дэмжлэг: Хятадын хувьцааны зах зээлийг сэргээх, хөрөнгө оруулалтыг нэмэхэд чиглэсэн арга хэмжээ нь хөрөнгө оруулагчдад илүү итгэлтэйгээр хөрөнгө оруулах боломжийг олгоно.  

3. Зээлийн зардлыг бууруулах: Зээлийн хүүгийн бууралтаар зээл авах зардал буурч, бизнесүүдийн хөрөнгө оруулалт нэмэгдэх нөхцөл бүрдэнэ. 

Ирээдүйн боломж 

1. Эдийн засгийн сэргэлт: Хэрэв эдгээр арга хэмжээнүүд амжилттай хэрэгжвэл Хятадын эдийн засаг богино хугацаанд сэргэлт авч, өсөлтийн замд гарах магадлалтай. 

2. Хөрөнгө оруулалтын өсөлт: Хятадын эдийн засаг сэргэхийн хэрээр олон улсын хөрөнгө оруулагчдын сонирхол нэмэгдэж, Хятад руу чиглэсэн хөрөнгө оруулалт нэмэгдэх магадлалтай. 

3. Дотоодын эрэлт нэмэгдэх: Хэрэглэгчдийн итгэл нэмэгдэж, дотоодын эрэлт өсөх нь эдийн засгийн өсөлтийг дэмжинэ.  

 

Зөвлөмж: 

Хэдийгээр эдгээр арга хэмжээ нь Хятадын эдийн засагт богино хугацааны өсөлт авчрах ч, урт хугацааны эрсдэлүүдийг анхаарах шаардлагатай. Хөрөнгө оруулагч, бизнес эрхлэгчид эдгээр нөхцөл байдлыг сайтар үнэлж, хөрөнгө оруулалтын стратегиа болгоомжтой тодорхойлох хэрэгтэй.