Голомт Капитал ҮЦК ХХК

Oracle-ийн орлого өсөж, AI салбарт итгэх итгэлийг нэмлээ.

Oracle компани 2029 он гэхэд үүлэн технологийн бизнесийн орлогоо 114 тэрбум ам.доллар хүртэл өсгөнө гэж төсөөлж байна. Энэ нь компанийн хувьцааг 36%-иар нэмээд зогсохгүй, хиймэл оюун ухааны салбарт итгэх итгэлийг шинэ түвшинд аваачлаа.

Энэ мэдэгдэл нь хөрөнгө оруулагчдад гурван үндсэн дохиог өгч байна:

1. AI-ийн эрэлт богино хугацааны бус урт хугацааны бодит бизнесийн цикл

Oracle-ийн 5 жилийн дотор үүлэн технологиос олох орлогоо 14 дахин өсгөнө гэсэн таамаг нь хиймэл оюун ухааны эрэлт түр зуурын сонирхол биш, харин үйлдвэрлэлийн бүх салбарт гүнзгий нэвтэрч буйг харуулж байна.

Энэ нь дата төвүүдийн хүчин чадалд асар их хөрөнгө оруулалт шаардах бөгөөд GPU болон AI чип нийлүүлэгчдийн урт хугацааны өсөлтийн боломжийг бататгаж байна.

2. Nvidia, Broadcom, TSMC бол томоохон нийлүүлэгчид

Nvidia: AI дата төвийн 70%-ийг эзэлдэг гэдэг нь тус компанийг хамгийн том хожигч болгож байна.
Broadcom: Nvidia чипүүдийг холбох сүлжээний тоног төхөөрөмж, захиалгат AI чип үйлдвэрлэлээр өөрийн байр суурийг бэхжүүлж байгаа.
TSMC: Nvidia болон AMD-ийн чип үйлдвэрлэлийн үндсэн түнш. 8 сарын борлуулалтын 34%-ийн өсөлт нь үйлдвэрлэлийн хүчин чадал тасралтгүй нэмэгдэж байгааг нотолсон.

3. AI экосистемд өрсөлдөөн, төрөлжилт нэмэгдэж байна

AMD AI чипний зах зээлд бага хувийг эзэлдэг ч өрсөлдөөний тэнцвэрийг хангаж байна.
Micron-ий дэвшилтэт санах ой, Super Micro болон Dell-ийн сервер системүүд нь экосистемийг өргөжүүлж буй чухал бүрэлдэхүүн хэсэг.

Oracle-ийн урт хугацааны өсөлтийн төлөв нь хиймэл оюун ухааны экосистемийг бүхэлд нь урагш түлхэж байна. Энэ нь зөвхөн технологийн компаниудын хувьцаанд богино хугацааны өсөлт авчрах бус, урт хугацаанд AI бол эдийн засгийн шинэ суурь дэд бүтэц болохыг бататгаж байгаа хэрэг юм.

---------------------------

Гадаад арилжаанд оролцох

https://forms.gle/3KQJBJAa44mQbb1q9