Anthropic IPO: Хувьцаагаа $70–$78-оор санал болгоно

Хиймэл оюун ухааны Claude загварыг хөгжүүлэгч Anthropic компани IPO хийх бэлтгэлээ эрчимжүүлж, нэгж хувьцаагаа 70–78 ам.долларын үнээр олон нийтэд санал болгохоор төлөвлөж байна. Тус компани 11-р сарын 18-нд хувьцааны эцсийн үнийг тогтоож, 19-ний өдрөөс Nasdaq биржид “ANT” тикерээр арилжаалагдаж эхлэх хүлээлттэй байна.

Anthropic нийт 825 сая ширхэг хувьцаа санал болгох бөгөөд үнийн дээд хязгаараар тооцвол 64.35 тэрбум ам.долларын хөрөнгө босгож, компанийн зах зээлийн үнэлгээ 1.4 их наяд ам.долларт хүрэх боломжтой. Мөн IPO-ийн хувьцааны 20 орчим хувийг жижиг хөрөнгө оруулагчдад хуваарилахаар зорьж байгаа нь ердийн IPO-ийн 5–10 хувийн түвшнээс өндөр үзүүлэлт юм.

Компанийн санхүүгийн үзүүлэлтүүд хөрөнгө оруулагчдын анхаарлыг татаж байна. 2026 оны эхний есөн сарын байдлаар Anthropic-ийн орлого өмнөх оны мөн үеэс ойролцоогоор 1,200%-иар өсөж, 33.24 тэрбум ам.долларт хүрчээ. Харин цэвэр алдагдал 104 тэрбум ам.долларт хүрсэн бөгөөд үүний дийлэнх нь хөрвөх өрийн хэрэгсэл болон дериватив өр төлбөрийн үнэлгээний өөрчлөлттэй холбоотой байна.

Түүнчлэн AMD, Nvidia, Microsoft, Google, Broadcom, Micron болон TSMC зэрэг технологийн тэргүүлэгч компаниуд Anthropic-ийн IPO-ийн үнээр нийт 26 тэрбум ам.долларын хувьцааг хаалттай хүрээнд худалдан авахаар тохиролцжээ.

Гэсэн хэдий ч өндөр хүүгийн орчин, AI дэд бүтцийн хөрөнгө оруулалтын зардал болон зах зээлийн үнэлгээтэй холбоотой болгоомжлол нэмэгдэж байна. Тухайлбал, өмнө нь Anthropic-ийн үнэлгээг 2 их наяд ам.долларт хүрэх боломжтой гэж үзэж байсан бол одоогийн IPO-ийн үнэ 1.4 их наяд орчим ам.долларын үнэлгээг илэрхийлж байна.

Хөрөнгө оруулагчдын хувьд Anthropic-ийн IPO нь AI салбарын өсөлтөд шууд оролцох томоохон боломж хэдий ч компанийн өндөр алдагдал, дэд бүтцийн санхүүжилтийн хэрэгцээ болон зах зээлийн үнэлгээний эрсдэлийг харгалзан үзэх шаардлагатай юм.