Хиймэл оюунтай (AI) Холбоотой Хувьцаанууд Өссөөр

Хиймэл оюунтай (AI) холбоотой хувьцаанууд энэ хугацаанд өсөлтөө хадгалсаар байна. Тодруулбал, NVIDIA Corporation (NASDAQ: NVDA) болон Amazon.com Inc (NASDAQ: AMZN) компанийн хувьцаа тус бүр 2% ба 4%-иар өсөж тэргүүлэгчдийн эгнээнд бичигдлээ.

Өнгөрсөн 7 хоногт болсон АНУ, БНХАУ-ын төрийн тэргүүнүүдийн уулзалтын өмнө, АНУ-ын өндөр албан тушаалтнууд Трампт “Nvidia-ийн Blackwell AI чипийг Хятадад экспортлохыг зөвшөөрөх нь АНУ-ын үндэсний аюулгүй байдалд заналхийлнэ” гэж анхааруулжээ. Энэ мэт худалдааны маргаантай холбоотой болгоомжлолын улмаас Nvidia-ийн өсөлт бага зэрэг саарсан байна.

Хөрөнгө оруулагчид энэ 7 хоногт гарах технологийн томоохон компаниудын тайланг анхааралтай ажиглаж байна. Өнөөдөр Advanced Micro Devices (NASDAQ: AMD) тайлангаа танилцуулах бөгөөд энэ нь хиймэл оюуны чипийн эрэлт үнэхээр өсөж буй эсэхийг бататгах юм. Өчигдөр хамгаалалтын салбарт чиглэсэн програм хангамжийн үйлчилгээ үзүүлэгч Palantir Technologies (NASDAQ: PLTR) тайлангаа тавьсан бөгөөд 2025 онд орлогын таамгаа 2 дахь удаагаа өсгөөд байна. Учир нь төр, хувийн хэвшлийн байгууллагуудын хиймэл оюуны шийдэлд чиглэсэн үйлчилгээний эрэлт эрс нэмэгдэж байна гэв.

Харин маргааш Uber Technologies (NYSE: UBER) болон McDonald’s (NYSE: MCD)-ийн тайлан гарснаар хэрэглэгчийн зардал, үйлчилгээний салбарын нөхцөл байдлын талаарх дүр зураг тодорхой болно.