Дайн үргэлжилж байгаа ч алт яагаад хүчтэй өсөхгүй байна вэ

Ойрхи Дорнод дахь геополитикийн хурцадмал байдал нэмэгдэж байгаа ч алтны үнэ хүлээгдэж байсан шиг хүчтэй өсөхгүй, харьцангуй тогтвортой хэлбэлзэж байна. Ерөнхийдөө геополитикийн эрсдэл нэмэгдэх үед хөрөнгө оруулагчид аюулгүй хөрөнгө болох алт руу шилжих хандлагатай байдаг. Гэвч энэ удаад зах зээлийн бусад хүчин зүйлс алтны өсөлтийг сааруулж байна.

АНУ болон Израиль 2-р сарын 28-нд Иранд цохилт өгсний дараа алтны үнэ унц нь 5,296 ам.доллараас 5,423 ам.доллар хүртэл өссөн. Гэвч удалгүй үнэ 6%-иар буурч, 5,085 ам.долларт хүрсэн байна. Сүүлийн өдрүүдэд алтны үнэ 5,050–5,200 ам.долларын хооронд хэлбэлзэж байгаа юм.

Алтны үнэ огцом өсөхгүй байгаа хэд хэдэн шалтгаан бий.

Юуны өмнө ам.долларын ханш болон АНУ-ын Засгийн газрын бондын өгөөж өссөн нь алтны эрэлтийг бууруулж байна. Алт нь хүү өгдөггүй хөрөнгө тул бодлогын хүү болон бондын өгөөж өндөр үед хөрөнгө оруулагчид илүү өгөөжтэй хөрөнгө рүү шилжих хандлагатай байдаг.

Мөн нефтийн үнэ өссөнөөр инфляц дахин нэмэгдэх эрсдэл үүсэж байна. Энэ нь төв банкууд бодлогын хүүг өндөр түвшинд илүү удаан хадгалах магадлалыг нэмэгдүүлж, алтны ханшийн өсөлтөд дарамт үзүүлж байна.

Үүнээс гадна зах зээлд тодорхой бус байдал нэмэгдэх үед зарим хөрөнгө оруулагчид эрсдэлийг бууруулах зорилгоор төрөл бүрийн хөрөнгөө зарж, богино хугацаанд бэлэн мөнгөжүүлэх хандлагатай байдаг.

Гэсэн хэдий ч томоохон банк, санхүүгийн байгууллагууд алтны урт хугацааны төлөвт өөдрөг хэвээр байна. Тухайлбал, J.P. Morgan 2026 оны эцэс гэхэд алтны үнэ унц нь 6,300 ам.долларт хүрнэ гэж таамаглаж байгаа бол Deutsche Bank мөн алтны зорилтот үнийг 6,000 ам.доллар орчимд хадгалж байна.